E SPEZZU LA CHITARRA Giovanni Formisano

E SPEZZU LA CHITARRA 

Lu cori miu vi veni a salutari,
pricchì è l'ultima vota ca vi parra,
cchiù tardu, comu sperdu di cantari,
rumpu li cordi e spezzu la chitarra !
E 'ddocu arreri vi la fazzu asciari,
tutta china di jelu e di limarra,
spizzannu ad idda, ju non cantu cchiui,
e non cantannu cchiui, mi scordu a vui !

O quantu voti, na la stanza mia,
parrai ccu d'idda di lu nostru amuri,
quantu canzuni di malincunia,
quantu ni 'ntisi lastimi e turturi !
Fu sempri duci la so cumpagnia,
duci li cordi chini di duluri,
ora la spezzu, sta cumpagna amata,
pri scurdarimi a vui, fimmina 'ngrata !

Giovanni Formisano

Ddocu arreri = dietro la porta ;
Asciari = trovare ;
Jelu = gelo ;
Limarra = fango.