SITI CUNTENTI ORA ? Giovanni Formisano

 . SITI CUNTENTI ORA ?

Terzo premio L. 200 e medaglia d'argento piccola.

Siti cuntenti ora, cori 'ngratu, 
ca sugnu misu 'nta 'nfunnu di lettu ?
Si si cuntenti ca sugnu malatu
e non haju cchiù paci e no rizzettu ?

Quann' haju la frevi ca mi trantulìa,
mi diciunu ca sparru e chiamu a vui,
chista, lu sacciu, è carugnunaria,
ma cchi cci curpu su n'arreggiu cchiui ?

Mi diciunu ca spissu, a vuci forti,
parru di tutti li vostri trisori,
puranchi ora, vicinu a la morti,
non vi pozzu scippari di stu cori !

Vinni lu preti e l'assoluzioni,
non mi la desi e non ci veni cchiùi,
pricchì, pri tutta la cunfissioni,
iddu parrava e iù chiamava a vui !

Giovanni Formisano