NON NI VIDEMU CCHIU' di Giovanni Formisano

NON NI VIDEMU CCHIÙ
Quinto premio L. 100 e medaglia di bronzo grande

Non mi videmu cchiù, partu luntanu
quantu almenu mi scordu tutti cosi
e vaju in cerca di un lucali stranu
unni la terra non pruduci rosi,
pirchì 'na rosa mi farìa pinzari
'ssa facci bedda e putirrìa turnari !

Cercu un lucali ca fussi ammucciatu
'mmenzu a li fogghi di tanti arvuliddi,
unni lu celu è sempri annuvulatu,
unni tutti li notti non c'è stiddi,
pirchì 'na stidda mi farìa pinzari
'ss' ucchiuzzi beddi e putirrìa turnari !

Cercu un paisi 'nmenzu a la stranìa
unni li casi non sunnu abitati,
quantu nuddu si vasa avanti a mia,
quantu non vidu genti nnamurati,
pricchì un vasuni mi farìa pinzari
'ssa vucca bedda e putirrìa turnari !

Giovanni Formisano