Di Turri Faru a Ciumara Vàrdia era 'u passu dì pirati pì pòviri carritteri sampiroti, chi 'nsunnacchiati di uri e uri 'i notti, 'ntè matinati passàvanu carrichi di pérsichi lisci, pumma lappeddi, pummadoru, piseddi...
I piscaturi chi durmévanu arreri 'a puppa di luntri, appena sintévanu 'u scrùsciu d'un carrettu, scattiàvanu addritta... "I sampiroti!... I sampiroti!..." e, cuteddu a mani, 'ssarpàvanu coti coti i sacchi darreri: i tagghiàvunu quantu bastava chi 'nta nachilatùccula du carrettu 'a robba nescissi fora e cadissi strata strata.
'U carritteri sampirotu sunnacchiava 'nta l'arburi dda' matinata: un'ura 'i caminu ancora e 'rrivava 'e majazzena 'i Pullicinu.
Ma darreri cadevunu pumma lappeddi e péersichi lisci... I pirati faroti caminàvunu 'n luntananza e cugghievunu 'dda bedda robba di Diu, ciaurusa, frisca, sapurusa.
Quannu 'u carritteri sampirotu 'rrivava 'e majazzena 'i Pullicinu, era jornu fattu; e tuttu svìgghiu ora videva bonu carchi saccu tagghiatu, e di 50 chili di persichi lisci, di pumma lappeddi o di chi sacciu iò, supra 'u bilicu cci ni mancàvanu di 10 a 15 chili: "Oh, 'u malu passu di pirati faroti!..."
Nessun commento:
Posta un commento