JNNARU

jovi 1 jnnaru 2015

JNNARU

Friddu cristallu ddu' misi 'i Jnnaru;
é friddu 'u suli di l'aranci,
i morti dòrmunu e non trantulìanu.

Sapuri di sorba
'mpinnuti a scocca
e néspuli giappuni
misi a fàrisi
'ntò lettu di pàgghia;
ciàuru di fogghi 'i làuru
bruciati
'ntò focu dda' conca,
e fumu di pinzeri
chi fa chianciri l'occhi.

Linzola di nùvuli
'ncuddar'anu i jurnati;
m'accupu 'o scuru,
aiutu!...
vogghiu campari!...

'U pedi 'i ménnula
ridi chi denti janchi,
ridi all'amuri.

Du' jatti rumulìanu
'o lustru 'i luna
friddu-

Ju mi quariu
'o ciatu dde' riordi
e 'llongo i manu
a circari manu,
manu ca m'aiutanu.

'A petra ddo' ciumi
vistuta di lippu
'spetta carizza di suli
e jocu di giurani
foddi e sgriddi
comu picciriddi.