Quann'è ca ti lassai, Sicilia mia,
ppi jraminni fora a travagghiari
mi supraniau la malincunia:
lu cori mi lu 'ntisi scamuzzari
A l'èstiru, parrannu ccu crianza,
iù ni suffreva ammenzu li francisi,
ma supratuttu ppi la luntananza
e ppi lu suli di lu me' paisi
'Njornu ca mi pigghiò la nustalgia
e a la stranìa cchiù non vosi stari
pigghiai lu trenu di la firruvia
e a lu paísi vosi riturnari
Quannu arrivai a lu strittu di Missina
e la me' terra iù potti ammirari
li lacrimi scinnevunu a lavina
e ppi la gioia cuminciai a cantari
Terra ca ccà nascii e ccà ha' crisciutu,
terra d'aranci e di li mannarini,
ti vogghiu beni e tornu arrisulutu
ca ccà iù vogghiu fari la me' fini.
Alfio Naso
Nessun commento:
Posta un commento