- Mamma, chi veni a diri 'nnamuratu?
- ...Vôldiri... un omu ca si fa l'amuri.
- E amuri chi vôldiri? - ... È un gran piccatu;
è 'na bugia di l'omu tradituri!
- Mamma... 'un è tantu giustu 'ssu dittatu...
ca tradimenti non nn'ha fattu, Turi!
- Turiddu?... E chi ti dissi, 'ssu sfurcatu?
- Mi dissi... ca pri mia muria d'amuri!
- Ah, 'stu birbanti!... E tu, chi ci dicisti?...
- Nenti!... Lu taliai ccu l'occhi storti...
- E poi ? - Mi nni trasii tutta affruntàta!...
- Povira figghia mia! Bonu facisti!
E... lu cori? - Mi batti forti forti!...
- Chissu è l'amuri, figghia scialarata!
Nino Martoglio
Note. - Dittatu (dettato, legge, definizione) - Taliai (guardai) - Trasii (entrai) - Affruntata
(vergognosa) - Scialarata (scellerata).
Nessun commento:
Posta un commento