MATRI DI LI MIRACULI di Francesco Rapisarda dicitore Armando Carruba

Francesco Rapisarda, di lui nel 1979 scriveva Salvatore Camilleri:
"...La poesia di Francesco Rapisarda è una poesia visibile, una poesia che si serve di immagini pittoresche di colori di colpi di spatola; una poesia vista prima con gli occhi del pittore e poi con quelli del poeta.

MATRI DI LI MIRACULI

Caminu tra lu nenti
di lu pinzari sarvaggiu di l'omu,
guardu lu celu, impiciatu di duluri umanu
ciumàra di lacrimi, ca trascinanu la genti
e cercu a tia, Matri di li miraculi,
na li funnali di lu cori
intra spiragghiu di suli di la me fidi
pi fari séntiri vuciati d'aiutu
di la me disiata prijera, a la to santa putenza;
Matri di li miraculi,
sénti na lu to pettu, lu tuppuliari di focu
di lu cori di tuttu l'universu?
vola a lu Calvariu, la to umbra prizziusa ca sbrillìa,
sfrazzuma lu fàusu Cristu
'ncurunatu Re di la viulenza,
scanza di la ruina la cruci di to figghiu
ca trantulìa supra lu munnu
a lu ventu di lu disordini,
ferma lu diluviu di tirruri, ca casca supra la genti,
fai di la nostra cuscenza 'nmari immensu
d buntati, di fratillanza,
pi tagghiari lu caminu a lu disprezzu di la pirsunalità,
e duna lu ciatu, Matri di li miraculi,
di cintinàra di cicluni a li pulmuni di lu munnu,
pi purtari n'a lu celu di la santità
intra a prijera c'adduma
l'amuri di li figghi
a la gran Matri di Cristu e di la genti.

Francesco Rapisarda