'U PANI DDO' BOIA - armando carruba -

Ci sunu cosi ca nun si fanu, pirchì i nostri patri ni dicevanu ca nun s'avunu a fari,  una di 'sti cosi è mettiri 'n tavula 'u pani a ruversa...
Si cunta e si ricunta - senza mittirici junta - ca tutti i matini un boja si firmava a' putìa ddo' furnaru e ci diceva:
- Mastru furnaru, sabbatimi 'n pani cco' ritornu mu pigghiu.
A disposizione! ci rispunneva... ma intantu su scurdava e quannu 'u boja turnava ci diceva:
- Scusassi m'haju scurdatu a sabballu!
Accussì a prima, a secunna, a terza vota, sinu a quannu dda' vicchiaredda di so' matri, ci dissi:
- Jiti tranquillu, 'o ritornu 'u truvati, 'u sabbu ju
E 'u sapiti cchi fici 'a vicchiaredda? Tutti i matini quannu sfurnava 'u pani nni pigghiava unu beddu tunnu, e u mitteva 'i latu, vutatu suttasupra, e diceva:
- Chistu è 'u pani ddo' boja!
Pirchissu è cattivu suguriu mettiri a tavula 'u pani suttasupra: è 'u pani ddo' boja!