VÈNNIRI È SANTU
Su’ attaccati i campani e nun si senti
pi lu paìsi mancu nu rumùri…
rogni piccatu comu petra senti
supra lu cori, rogni piccaturi.
È muortu lu Signuri. ‘A Santa Vara
purtata è ‘n prucissioni pi la via.
Prèija la fudda rispittusa. Amara
batti ’a trancàscia, lenta la gnunìa.
‘U mantu a luttu ci àvi ’a ‘Ddulurata
cianci lu fìgghiu suòu, stu beni ‘rànni
c’havi ri spini ’a testa ‘ncurunata
e ciòva ca ci pèrciunu li carni.
-Matri, comu putiemu alligghirìri
stu gran duluri ca fa siccu ’u ciantu?!
Pòviri scialarati senza firi
chi spata ca ti mìsumu ntô ciancu!
Pàtiemu anziemi a tia, Matri r’amùri
e sti prijeri vòlunu pi l’àriu
a Gghèsu, ca pi niàutri piccaturi
la cruci s’accianau ‘nta lu Carvàriu.-
Scunci la cira appriessu â Santa Vara
purtata ‘n prucissioni pi la via.
Prèija la fudda rispittusa. Amara
batti ’a trancàscia, lenta la gnunìa.
Da "Scàmpuli ri cielu" Franca Cavallo
Nessun commento:
Posta un commento