LA ME' VITA SI TU Giuseppe Vitale

.

LA ME' VITA SI TU

Si tagghi lu mè cori feddi feddi
dda jntra pircantata trovi a tia,
'ntrinsicata ccu musculi e ccu peddi
pirchì fai parti di la vita mia.

Si ccu ssi jta spilluncati e beddi
mi grapi l'occhi e poi ccu maistria,
t'adduni jntra li mè vavareddi
trovi la bedda to' futugrafia.

Si ccu' 'ncuteddu mi spunni lu ciancu
o masannunca mi tagghi li vini
vidi ca scurri lu to' stissu sancu.

Si tu mi lassi sulu tra li spini
filicità pi tia non ci nnè mancu
pirchì patisci la mè stissa fini

Giuseppe Vitale.