CUI MI MANCAVA? di Giuseppe Nicolosi Scandurra

CUI MI MANCAVA?

Sutta li stiddi, campagni campagni,
ripusaunu 'n paci li viddani,
facennuci di specchi e fonti e stagni
cantaleni facevunu li rani.

A li timpi, ali chiuppi, a li muntagni
'ncutti 'ncutti abbajavunu li cani,
e la caccia, facennusi li nagni,
sunava l'acqua 'ntra ciumi e pantani.

Ju 'nta lu jazzu aggiuccateddu, mutu,
di tutti chisti mi 'mprissiunava
e stava abbabbanutu abbabbanutu.

Dannu suspiri all'aria senza posa,
disiddirannu a chidda ca mancava:
cui mi mancava? mi mancava Rosa.

Giuseppe Nicolosi Scandurra
(da NATURA E SINTIMENTU)