C'ERA LA LUNA di Giuseppe Nicolosi Scandurra

C'era la luna
.
Ntra lu silenziu di la notti funna
sulu pri la campagna caminava;
c'era la luna ccu la facci tunna; 
chi li munti e li chiani inargintava.
Non si muvia di l'arvuli na frunna,
ogni filiddu d'erva ripusava,
di lu mari durmia placida l'unna
e l'aura di la notti triunfava.
Ntra lu funnu vadduni, alluntanatu,
sintia lu cantu di lu rusignolu
ca duci si spargìa di pratu in pratu.
Lu passanti cantava pri la via
ccu la cadenza a l'usu campagnolu,
e la luna la scena si vidìa.

.
Giuseppe Nicolosi Scandurra.