PAISANI LUNTANI di Michelangelo Balistreri

PAISANI LUNTANI

Fu lu travagghiu
a spartiri la matri da lu figghiu
a fari addivintari u cori 'na valigia
inchennula di sogni e di spiranzi.

E fu l`America la calamita
ca cu li so ricchizzi si li purtò luntanu,
cuntavanu u ritornu 'ne jita di na manu,
ma annu doppu annu ci passaru a vita.
E furu l`occhi `ntall`urtima vasata
ca si stamparu lu paisi dintra a lu cori
agginucchiati 'e pedi di l`Addulurata
cu l`urtima prighiera
incheru li vapura chini di chiantu.
Passau lu tempu
ma è sempri comu u primu jornu
e quanti voti, nta notti,
stanchi di lu travagghiu
si susunu `nfilati intra un sognu
cu li finestri aperti
e l'occhi sbalancati o novu munnu,
circannu lu paisi
li Chiesi, li strati,
anticchia di scogghiu
e l`occhi di 'na matri
ca chiu` luntana
ancora aspetta so figghiu.

di Michelangelo Balistreri