martedì 16 giugno 2015

JUCULANEDDA di Nardu Torrisi - da Sfogu di cori

JUCULANEDDA
Non cridu ca non lu sai significari
quannu 'n picciottu 'ntrignu ti talia;
non cridu ca non lu sai lu verbu amari,
lu spasimo ca porta a la pazzia;
si non lu sai e ti lu voi 'mparari,
Jaculanedda, 'nformiti ccu mia
ca ti lu sacciu nta nenti 'nsignari
a tia ca svampi e duni puisia.
Tu mi metti lu focu 'nta li vini,
smovi la musa e 'nnardiri la fai;
comu lu mustu d'intra di li tini,
vugghi 'stu cori e tu la curpa l'hai,
tu ca l'attacchi ccu cordi e catini
ccu ssu juchettu ca non speddi mai :
lu megghiu jocu di la carusanza
ccu li lusinghi di l'amuusanza.
Di ssi juchetti ormai n'haiu abbastanza,
stancu ni sugnu e mi vogghiu accirtari;
non mi tèniri cchiù misu in vilanza,
lassami, nicaredda, tranquillari;
dimmillu chiaru si 'cci n'haiu spiranza,
si mi voi beni o si non mi voi amari;
si non cridi ca svampu di disìu,
làssimi 'n paci, quantu sdillirìu !
Nardu Torrisi
da : Sfogu di cori

Nessun commento: