'A VIA DULURUSA di Suor Teresa Fichera

‘A VIA DULURUSA

                       di

         Suor Teresa Fichera

PRIMA STAZIONE  ‘A Cunnanna

Pilatu, cummintu  avia dichiaratu:

ppi mia st’ominu è innuccenti!

Chi mali fici ppi ‘ssiri cunnannatu?

Ma poi scantannusi ‘i tanta genti…

“Barabba sia libbiratu!”

“Nun ti macchiari ddo’ sangu di ssu giustu”

so’ mugghieri l’avia avvisatu

‘nto cunnannari nun ci pigghiari gustu.

Gesù vinutu ppi salvari u munnu,

ora è trarutu e malatrattatu.

L’amuri so’ è veramenti granni,

si pirduna a cu ‘u pigghia a coppa ‘i canni.

Quanti cunnanni, sintenzi e giurizzi,

difetta e piccati, sapemu truvari!

Pirduna Gesù bonu, i nostri vizi,

quannu l’autri ni mittemu a giudicari

‘ngiustamente fu accusatu

e a morti cunnannatu

semu genti senza cori

pietà Diu, pietà Signuri.

SECONDA STAZIONE  ‘A Cruci

Supra ddu corpu accussì marturiatu

supra ddi spaddi accussì scunsintuti

lignu raspusu ccu forza è pusatu

di milli surdati  di Roma vinuti.

Rumpi l’ossa ssa cruci pisanti

ppi purtarla ‘ncima a ddu munti

ci voli l’aiutu di tutti ‘i Santi

ma è ssu lignu ‘a sabbizza di tanti.

Cruci vitturiusa e triunfanti

lettu di Gesù Cristu veramenti

unni pusaru ddi carnuzzi santi

unni Diu patì peni e tormenti

Ssa cruci è fatta di duluri e peni

abbrucia ‘nto cori e trasi ‘nte vini

Gesù ci potta ‘i patimenti ‘i tutti

poveri, ricchi, ‘gnuranti e dutti

Cristu, martiri divinu e Santu

ca suppurtasti ‘n mari ri duluri

dimmi pirchì patiri vulisti tantu?

u facisti po’ to’ immensu amuri?

Vita eterna e salvamentu

u so’ sangu sia ‘n unguentu

ca salvizza ni produci,

gloria a Cristu e a la so’ cruci

TERZA STAZIONE  Gesù cari ‘a prima vota

Ristrurutu, nu sa fira a caminari

acchiana ppi fozza, ma ‘mpinci a ogni passu.

“Cruci mia, nun ti pozzu cchiù purtari!

Mi sentu ‘n nenti, scunsintutu e scarsu.”

E cari ‘n terra, scafazzatu da cruci,

è sulu a purtari  u mali ddo’ munnu.

Nun parra, è nun fa sentìri a so’ vuci,

e camina ‘n silenziu prufunnu.

Quannu nun dugnu aiutu a ‘n amicu

o si viru suffriri ‘n fratuzzu

e passu avanti e nenti ci dicu

m’ammucciu ‘a testa comu nu struzzu

Gesù pirduna a friddizza mia,

‘nzignimi a ddari cunfortu a tutti,

speci a ccu patennu s’abbilìa,

e a ccu chianci ppi duluri e lutti.

Duci Re d’eterna gloria

fu di spini ‘ncurunatu

e carennu sutta a cruci

nui l’avemu umiliatu  

QUARTA STAZIONE  ‘A matri

Maria, acchianannu ‘o suppliziu,

mentri a sso’ figghiu varda amurusa,

pensa a ddu fausu e infami ggiuriziu

ca ‘a misi ‘nta ssa via dulurusa

E’ cosa ri ‘n lampu, ma passanu tanti pinzeri,

tra matri e figghiu, senza parrai,

cc’è tutta ‘a storia di oggi e d’aieri,

e tuttu chiddu ca amuri sa ddari

“Matri mia ti vulissi abbrazzari!”

“Figghiu miu, ti vulissi vasari”

ma ora basta ‘u ‘ncontru dde’ cori

pirchì a vuluntà ‘i Diu sempri ssa’ fari.

Fammi forti, Maria ‘nte mumenti amari

quannu l’anima voli ‘ssiri cunsulata…

sulu tu mi po’ capiri e aiutari,

matri mia bona, Maria addulurata.

Si Maria n’avissi mantu

forumu persi tutti quanti

lu so’ nomu ludatu sia

viva la Virgini Maria

QUINTA STAZIONE ‘U Cireneu

Turnava dda’ campagna Simuni di Cireni

stancu e suratu di na jurnata ‘i travagghiu,

e pinzava: “Arripusarimi certu mi cummeni,

si finiri dumani u chiffari vogghiu”.

Assaporava già a paci da so’ casa,

quannu ‘ncontra ‘n poviru cunnannatu.

Pareva ‘n ammassu d’ossa ca ‘a terra vasa

senza valìa ‘i trascinari ‘u lignu distinatu.

Simuni è custrittu a purtarici a cruci.

Cruci santa e biniditta, macari si è pisanti

Certu fastidiosa e ppi nenti dduci,

ma conza ‘u cori ppi fumari i Santi.

Davanti a ccu patisci ‘n patimentu amaru

nun vogghiu fari finta ‘i nun capiri nenti

‘u dici ‘u cirineu cull’esempiu so’ chiaru

ca s’ha aiutari u prossimu dulenti

U Signuri fu aiutatu

Da ‘n bon’omu cunfissatu

Fu Simuni ‘u Cireneu

Ca ‘a cruci ci puttau

SESTA STAZIONE   ‘A Veronica

Quantu baccanu e cchi succedi

‘nta strata? Si senti passari

na ciurma ca di vucitari pari

vuci, chianti, scrusciu di peri…

s’affaccia Veronica da so’ finestra

curiusa di sapiri ‘a ragiuni

di tantu baccanu e confusioni

ca ‘u silenziu rumpi e l’aria appesta

Cu è stu mischineddu ‘nsanguinatu

ca camina a stentu supra u pruvulazzu

unni u porta poviru e pazzu

stu populu crudeli e fursinnatu?

U cori di Veronica piatusa

risistiri nun po’ a tanta pena

straziata si senti di sta scena

assai pinusa e troppu dulurusa

jancu di linu pigghia ‘n fazzulettu

è tuttu chiddu ca idda ppo’ fari

cori e manu pronti pp’asciugari

sangu e surura ca scinni ‘nfinu ‘o pettu

Miraculu! Gesù, pitturi raru,

stampatu viru supra o jancu linu

tuttu u to’ duluri d’ominu divinu

e ‘nto me’ cori duci si fa l’amaru

Li to’ lacrimi Signuri

li sciucau na donna pia

e lu velu di lu chiantu

pisa ancora ‘nta l’arma mia

SETTIMA STAZIONE  Gesù cari a secunna vota

Tutta ‘a miseria umana e a priputenza

odiu, guerra, morti e viulenza

Gesù porta supra a so’ cruci, strumentu

di sarvizza e di giustu pintimentu

Perciò cchiù pisanti addiventa ‘u lignu

ppi vinciri u vilenu ddo’ Malignu,

e Gesù, carricu d’amuri, cari ‘n terra,

e ppa secunna vota i denti serra.

Pirchì tantu granni è ‘u so’ duluri?

Ma unni ssu tutti l’amici to’ Signuri?

Chi fanu si nun ti pottunu aiutu,

e ti lassanu ‘n terra sfinutu?

E’ a durizza dde’ nostri cori straviati

è a superbia dde’ nostri piccati

u mutivu di tanta caduta è ‘a nostra malvagità:

è l’odiu a friddizza è a nostra crudeltà

Sutta ‘u pisu di la cruci

casca ancora l’Unniputenti

tutti gridanu a gran vuci

Gesù casca e serra i denti

OTTAVA STAZIONE  I fimmini ‘i Gerusalemmi

E mmentri Gesù porta a so’ cruci

‘n pugnu ‘i fimmini ci camina ‘a cantu

chiancennu cu lamentu e facennu vuci

battennusi u pettu sutta u mantu

Virennu tutta sta pinusa scena

Gesù dici: “Figghi di Gerusalemmi,

nun chianciti supra a mia a vostra pena,

chianciti ppi vuautri e ppi Gerusalemmi!

Suspira e lacrimi do cori ittati

e ‘e figghi vostri pinzati e chianciti

co cori pintutu dde’ vostri piccati

ppi fari a Diu cosi graditi!”  

Quannu viru unu ‘n suffirenza

vulissi chianciri supra o so’ cori

lacrimi sinceri e di bona speranza

cu animu apertu a vera fratellanza.

Boni donni binvinuti

ca chianciti ppi pietati

megghiu fussivu pintuti

vi chiancissivu ‘i piccati

NONA STAZIONE Gesù cari ppa terza vota

Fu pistatu do nostru dilittu

murìu ppa’ nostra malvagità

accussì Isaia havia pridittu:

‘a so’ morti ‘u munnu sabberà!

‘Nnuccenti, senza piccatu

piccaturi ppi Diu a nostru favori

ppa terza vota cari ‘n terra, è sfinutu

jetta sancu e abbunnanti suturi

ma pirchì, ancora, nautra caruta?

u patimentu so’ nun è ancora finutu

strazziatu ‘nsinu all’ossu è l’ominu ‘mmaculatu,

sutta ‘o pisu ddo’ nostru piccatu

Crucifissu, beni miu prizziusu

a cunfissioni stu cori miu cunnuci.

E quannu sugnu tintu e stizzusu

Fammi pinsari a sta caruta atruci

Terza vota già carìu

lu miu amabili Gesù

ora sì ora finìu

ora nun si susi cchiù

DECIMA STAZIONE Gesù spugghiatu di li vesti

Comu arrivò a distinazioni

supra u Calvariu, ppa’ crucifissioni,

Cristu è spugghiatu di vestimenti e mantu

cu avissi dittu ca s’arrivava a tantu!

I surdati s’acchiaparunu ccu’ disprezzu

a bedda tunica, ‘ntissuta tutta ‘i pezzu

di l’autri ‘mmarazzi ni fanu quattru parti

e a tunica, ‘nmeci, sa’ jocunu a sorti.

“Eccu l’ominu!” Diu spugghiatu di tuttu

nun havi cchiù nenti, sulu ‘u corpu distruttu

chiddu ca criò a Terra e Universu

ora biddizza, saluti e unuri à persu.

Affamati marturiati e infamati

su tutti chiddi de diritti privati

ppi manu d’autri senza umanità

su assai l’omini privi ‘i dignità

Fu spugghiatu di la vesti

nudu e sulu accussì resti

na curuna i spini ardenti

e u Calvariu a passi lenti

UNDICESIMA STAZIONE Gesù ‘nchiuvatu a la Cruci

Gesù, ora, supra ‘a cruci è stiratu

Cche’ vrazza aperti e i peri ‘ncucchiati

‘n manteddu ppi ssa mala morti è priparatu

e tri chiova puntuti ppi ‘ssiri chiantati

Oh Cruci di bon lignu triunfanti

teni a Cristu abbrazzatu Onniputenti

supra ‘u scogghiu lu teni peri stanti

supra na puppa di tutti li venti

Eccu c’abbucca sutta ‘u so’ pisu

siccu  di siti e sfinutu ora è

supra a so’ testa trionfa ‘n abbisu:

“Gesù Nazzarenu di Giuda gran Re”

Eccu ‘nta tirrinu  siccagnu e arsu

È schiantata ‘a macchia co so’ fruttu

‘e dutti pazzia ssa morti à parsu

sabbizza fu ppi lu munnu tuttu

Gesù Vi viru ‘n cruci

vi viru nudu e chinu di firiti

lu Vostru sancu, Diu, ppi mia spargiti

pi li piccati mia Vui patiti!

Oh Diu d’amuri e summa caritati

quantu granni è l’amuri ca m’aviti

ju sugnu piccaturi e Vui chianciti

ju sugnu dibituri e Vui paiati!

Signuri datammilla l’acqua viva

comu la dasturu a la Samaritana

havi tant’anni ca ni sugnu priva

havi tant’anni ca ni sugnu luntana

Signuri miu crucifissu ppi ll’amuri

dammi u curaggiu di tirari drittu

e sutta a to’ cruci miu Sabbaturi

fammi priari lu to’ cori trafittu

Pena mia l’hanu ‘ntacciatu

cu li chiova do’ piccatu

sali a Diu lu me’ duluri

crucifissu è ‘u me’ Signori

DODICESIMA STAZIONE Gesù mori ‘n cruci

Prima ca ‘a morti di pussessu ‘u pigghi

tra duluri criscenti e granni affannu

Gesù dici: Patri miu, pirduna sti figghi,

pirchì nun sanu chiddu ca fanu!

‘e peri da cruci, a Maria Addulurata,

do discepulu ‘i fiducia accumpagnata,

rici: “Matri, t’accunsignu u munnu ccu Giuvanni”

e a Giuvanni: T’affidu Maria ppi tutti li so’ anni.”

E a unu dde latruni, ca ci fa bon visu,

ci assicura ppi subbitu ‘n postu ‘n pararisu

poi, cunsumata tutta a so’ passiuni

dici a so’ Patri: “Finuta è a me’ missioni”

Fammi ristari sutta sta cruci, miu Signuri

pp’accapiri u prezzu do to’ ‘mmensu amuri

amuri veru nun varda peni e sacrifici

ma soffri e pati ppi tutti li so amici

Chianci omu chianci cori

‘nto virili Diu ca mori

penitenza piccaturi

ppi lu sancu ddo’ Signuri

TREDICESIMA STAZIONE Gesù scinnutu dda‘ Cruci

Cu ‘n ferru puntutu ci sfunnunu ‘n ciancu

sfreggiunu u corpu, ora ca è mortu,

ddo’ tagghiu ci nesci acqua ccu sancu

e si ferma ‘u Celu cu lu munnu tuttu

A unu a unu i tri chiova ssu luvati

è libbiru u corpu strazziatu

aspetta so’ matri che vrazza graputi

ppi stringirisi ‘o cori ‘u figghiu so’ amatu

Tutti i voti ca m’alluntanu dda’ cruci

pirchì è troppu pisanti la me’ sorti

m’alluntanu da via ca a Cristu cunnuci

ssi chiova m’attaccunu a vita ‘mmeci ca a morti

Ristari vulissi sutta a Cruci ccu fidi

accittari a Cruci comu na scala

è chistu ‘u discursu i ccu dicidi

se ‘a strata è chidda bbona o chidda mala

Oh Maria addulurata

da lu figghiu tantu amata

‘u abbrazzasti ccu’ duluri

 a lu mortu me’ Signuri

QUATTORDICESIMA  STAZIONE Gesù sepoltu ‘nto Sepulcru

Giuseppi d’Arimatea, amicu ‘i Gesù

addumanna a Pilatu u corpu divinu

 si porta ‘n linzolu, novu di linu,

ppi mittirici a Cristu cu Santa virtù

è prontu ‘u sepulcru ‘nta na timpa scavatu

è novu, spazziusu è bonu ppi Cristu

ppi iddu, Giuseppi l’havia accattatu,

ma ora è filici e cuntentu ppi chistu

‘nta ‘n linzolu fu ripostu

chianci Patri ‘u figghiu mortu

Sippilliri ppi sempri ‘nto sepulcru vulissi

I me’ tanti piccati di superbia e malizia

Cco’ sonu dda’ trumma ddo’ sepulcru poi scissi

Purtannu ‘nto cori splinnuri e dilizia

Madonna mia nun chianciri cchiu’

vicinu ‘o sepulcru c’è tanta spiranza

resta ccu mia finu a quannu Gesù

ritorna ‘nta terra ccu granni esultanza!

E a tri ghiorna risurgiu

Gloria  o Patri e a Gesù miu…

E a tri ghiorna e  risurgiu

Gloria o Patri e a  Gesù miu 

Suor Teresa Fichera