domenica 19 febbraio 2017

TACCUNA DI MULINU di Gaetano Passarello


TACCUNA DI MULINU

Du junti di finissima farina
'ntà 'na maidda di nuci pirciuliata
'na brocca d'acqua di la Migliurina
e di sali marinu 'na sbruffiata

Davanti a la maidda 'na carusa
bedda comu lu suli di Natali,
ca ccu li manu ammisca a la rinfusa
'stu 'mpastu d'acqua, di farina e sali.

E canta e arriri e mungi e arrufulia
e vota e svota, afferra, poi 'ncutugna;
ogni tantu farina sbruvulia
e ammisca e sbatti e ammutta cu li pugna.

Poi isa 'stu pastuni e ancora arriri
filici pirchì giustu ci assumigghia
a chiddu ch'é ammucciatu e nun si vidi
sirratu di curpettu e di mantigghia.

Scaniaturi, cuteddu e sagnaturi,
jrita lesti e manuzzi fanu u restu
su pronti li taccuna e ppi ddu uri
su stinnuti a lu friscu. Poi 'ntà 'n testu

di crita russa di Caltagiruni
pumaroru, pipiddu e cipuddazza
ògghiu d'aliva misu a biviruni
pitrusinu e d'agghia 'na tistuzza.

Di basilicu quattru pampineddi
e a focu lentu, sempri arriminannu
dda carusa talìa ccu l'occhi beddi
ca si s'accarpa è grossu lu malannu.

Sarsa e taccuna poi 'ntà 'na maidda
cu cucchiara di lignu arriminati
allegramenti ta surrisi e sgridda
di ricotta salata sbruvuliati.

Finisciunu davanti 'e comminsali
ca comu sanculotti, a parapigghia
cu cuntornu di vinu e di bucali
espugnanu d'assartu la Bastigghia.

Quannu taccuna ccu sarsa e ricotta
cu mulinciana su davanti a mia
nun sacciu si mi manciu la picciotta
o un pezzu di la nona sinfunia!

Gaetano Passarello

Nessun commento: