`A chiamavanu "navetta" pirchì di navi avia `a prua a punta e banneri a gran pavisi; ma era `na carretta a tri roti `i bicicletta, , dui di latu e latu e una darreri cco` pidali a catina, e un passamanu faceva di manùbbriu `nta puppa tagghiata a paru, unni c`era un purtiduzzu ppi sabbari scàtuli, cascitti, `u ghiacciu `ntò saccu, cosi ca giuvavanu, puru `a pompa `i bicicletta ppi unciari `i roti.
Pittata e `llustrata `i tuttu puntu, `sta specie `i carretta, `ntè misi `i `stati, furriava ppì Sarausa. Ddu` puzzi `i gilati beddi chini, nun vanniava mastru Cicciu sunava `na campanedda ppi strati e vaneddi e i carusi currevanu ppo` gilatinu.
- Unu `i deci liri a mia don Cicciu...
- e unu a mia di cincu liri...
I surduzzi cadévanu `nta spaccazza ddò cummogghiu, `nta `na cascitta ca a picca a picca lassava `u scrusciu 'i vacanti
Nessun commento:
Posta un commento