I CHIAVI DDO' PARADISU (sintuta da 'u zu Ninicu Cipudda) - armando carruba -

C'era un vecchiu  chi sapeva unni si truvavanu 'i chiavi ddo' paradisu. Iddu 'u sapeva, ma a nuddu cci 'u diceva; e... ancora nun l'avia circatu, picchì

"longa è 'a strata,
pitrusu 'u caminu!"

Tanti 'u vulévunu sapiri e cci dumannàvanu, ma a nuddu iddu cci 'u diceva, a tutti iddu rispunneva ch'era un gran sigretu scrittu 'ntò libru ddo' Cincucentu; e poi turnava a diri

"longa è 'a strata,
pitrusu 'u caminu!"

A lettu di morti cci jvu a cunfissallu un patri cappuccinu e ci vosi dumannari s'era veru chi sapeva unni si tròvanu i chiavi ddo' paradisu.
- Mònaci e parrini studiati, pridicati e cantati missa, ma di 'nfernu e di paradisu picca o nenti nni sapiti. Sta scrittu 'ntò libru ddo' Cincucentu: "Sa vi rinesci di pigghiàri 'na ciucettula e di 'rapirici 'a 'ucca senza fàricci mali, cci truvati supra a lingua i chiavi ddo' paradisu.