giovedì 30 marzo 2017

INNO ALLA CROCE (popolare Milena CL)

video

INNO ALLA CROCE

Cruci vitturiusa e triunfanti
lettu di Gesù Cristu veramenti!
Unni pusaru ddi carnuzzi Santi
unni Diu patì peni e turmenti!

T'haju truvatu oh Cruci, carricata
supra li spaddi di l'Eternu Amuri
e nni li vrazza tò, cruci sagrata
vosi muriri lu me' Redenturi.

Arvulu avversu di qualunqui ciuri
ca nuddu sapi li to' radicati,
ti po' chiamari arvulu d'Amuri
ca teni 'n vrazza la Divinitati.

Lignu di quannu t'appiru a tagghiari
di li celi nni vinni l'ammasciata;
di chissu lignu Cruci n'hata fari
ppi li vrazza di Cristu misurata!

Tronu di nostru Diu purificatu
spargi lu sancu e la divinitati
lu nomu di Gesù sarà ludatu
e ludammu la Santa Trinitati.

Oh Cruci di bon lignu triunfanti
teni a Cristu abbrazzatu, onniputenti
supra 'u scogghiu lu teni a pedi stanti
supra 'na puppa di tutti li venti.

Cristu ppi l'omu patì peni tanti
patiu li cchiù terribili turmenti
'n Cruci ni morsi lu Re di li Santi
lu Cibbu di li Santi Sacramenti

(popolare - Milena CL)

Nessun commento: