martedì 7 ottobre 2014

A LA SICILIA MIA di Francesco Guglielmino

A LA SICILIA MIA

'N pueta ca nasciu 'ntra li firuri
unni lu suli sempri ci scarsìa
ieva spiannu 'n jornu a lu sò amuri
si dda terra prumissa canuscia
unni l'aranci sbocciunu li ciuri,
unni 'ndurata spunta la lumia,
unni li frutti pigghianu sapuri
e pari ogni racina marvasia.
Chista è la terra ca sinteva diri:
ccà li malati sananu, ccà sunu
beddi li jorna e megghiu assai li siri,
e l'occhi di li fimmini sù stiddi
ca si amurusi guardanu quarcunu
parranu suli e jettunu faiddi!
E si sta terra spissu havi svinturi
però non perdi mai la puisia,
ed è balsamu a tutti li duluri
lu suli ca nni duna l'alligria.
Perciò iu comu l'edira a li muri
sugnu attaccatu a st'isulidda mia,
e mancu si mi fannu 'mpiraturi
cu 'n autru regnu mi la cangiria.
E siddu 'n jornu mi n'avissi agghiri
sarria comu 'n aceddu 'ntra li riti,
comu 'n pisci 'ntra l'aria suspisu:
e quannu veni l'ura di muriri
nuddu cunfortu dari mi putiti
picchì lu lassu ccà lu paradisu.

Francesco Guglielmino

(Francesco Guglielmino, (1872-1956, catanese, professore di lingua e letteratura greca all'università di Catania, insigne filologo e poeta dialettale, la poesia riportata è tratta dalla raccolta "Ciuri di strata")

Nessun commento: