Ricordando l'amico Giovanni...

Frustèri di Giovanni Torchevia

- Attìa!

..Cu è chissu? .. U canusci?
- Frustèri!

Ju, .. frustèri!
nà sta stratuzza ca mi vitti nasciri
e ribbumma ancora di me grida,
quannu, sudatu ma chinu i sana vita,
m'arricampava di jucari all'Acquacrita.
Ju, .. frustèri!
nà sta casuzza, primu nidu ppi mia,
poviru puddicinu
lassatu troppu prestu da sò ciocca,
propriu a pincipiu d'un malu matinu.
Ju, .. frustèri!
m'assittava all'anghiru i San Carlu
e passava i me jurnati
puntannu l'occhi supra a dda muntagna,
cu vuoscu da Jumenta
e, finu o ciumi, na bedda campagna.
Assicutava pinzeri di carusu
vulannu celu celu cull'ali d'un cruvacchiu,
ch'era u veru patruni dù paisi
e duminava, attentu e maistusu, aducchiannu casteddu e massarii,
da Cubba a Turricedda,
allivoti cchiù luntanu,
da Francavidda finu a lu Pantanu.
Pasculi virdi e puru culurati
giallu jnostra e russu paparina,
ricchi di vacchi, di crapi e di cavaddi.
U suli, calannu 'nta muntagna,
tincia u celu di malincunia
e na campana lenta n'avvirtia:
"Signativi ca Cruci, sona Avimmaria!"
Mastru Cola turnava i Marcataru,
supra a sò sciccaredda pacinziusa ca trascinava na crapa pristignusa.
"Vattinni intra, è tardu!" - Mi dicia,
"Sabbenedica nannu, vegnu cu vossia!"

Eranu i tempi da prima carusanza,
jorna filici ca prestu sinni ieru.
Vola u cruvacchiu, ma cchiù nun mi canusci,

oggi, ju sugnu sulu un frustèri!