LA CICOGNA di Giuseppe Denaro

LA CICOGNA

- Varda Rusidda, 'zoccu ci purtau
ajeri la cicogna a to' matruzza:
talè ch'è bedda, n'autra suruzza,
dintra la nostra naca la pusau.

- Matri, però ss'aceddu s'addiccau:
Carmela, Vicinzina, Tirisuzza
semu se' fimminazzi cu Ciccuzza...
ma chi daveru, va, si lu scurdau

di purtarici almenu un masculazzu?
sugnu spinnata p'un fratuzzu beddu...
e c'è me patri poi ca nesci pazzu

pirchì voli, pi forza a Pippineddu!
- Figghia, la curpa l'havi 'dd'acidazzu...
- Ma matri mia, pirchì nun canci aceddu?

Giuseppe Denaro