Ammenzu celu, lucida la luna
d'argentu friscu 'mpanna la campagna,
a cavaddu a li munti, la muntagna
cu la frunti scuverta sguardi duna.
Lu risinu liggeru s'abbannuna
'n punta a li fogghi e mutu mutu stagna,
l'ummira, d'ervi e d'arvuli cumpagna,
'ntra tavulozzi addisignari sduna.
Parennu ca di l'aria 'n terra casca
lu gran silenziu attornu attornu a mia,
mancu si movi un capiddu di frasca.
'Ntra li me vini, 'ntra lu sintimentu
ca si cunnuci mentri spingulia,
di sta viduta la ducizza sentu.
Giuseppe Nicolosi Scandurra
(da Natura e sintimentu 1951)
Nessun commento:
Posta un commento