POESIA DIALETTALE SICILIANA

L'UMANA FILICITA'

Appena l'omu veni giniratu,
Prima c' avissi d' omu li divisi,
Senza delittu resta carceratu
'Ntra l' uteru maternu novi misi.

Poi finalmenti a la luci spuntatu
Nasci cianciennu, privu di difisi ;
'Un senti, 'un vidi, 'un parra, 'nn' ha odoratu,
E 'ntra lu muccu li sò membri ha 'ntrisi.

A ccomu poi cumincia a crisciuliari,
Veni suggettu a milli 'nfirmità,
Pri cui mardici e odia lu campari.

Riduttu 'nfini a la canuta età,
La passa notti e jornu a suspirari :
Chista di l' omu è la filicità.

Carlo Amore - 'U zzuoppu Amuri - ( Modica 1768 - 1841 )