GNOCCULI TRAPANISI di Salvatore Mazzeo

GNOCCULI TRAPANISI

Quattru spicchia d'agghiuzza arrisittata
un pizzicu di sali biancu e finu
basiricò di chiddhru a mazzu chinu
pistati 'nno murtaru di balata.

Dopu 'na pistateddhra cci mittiti
sei mennuli munnati e spiddhruzziati
pistati ancora e quannu vi stancati
du' spezzi macinati cci aggiunciti.

Quannu lu pistu è divintatu finu
tri pumarori russi ammanticati
e sempri arriminannu cci rattati
un pocu di tumazzu picurinu.

Stu sdilliziu livati d'u murtaru
mittennilu nton piattu cupputeddhru
sdivacaticci d'ogghiu un cuppineddhru
arriminannu sempri c'u cucchiaru.

Sta nell'arriminata 'a puisia
picchì chissa 'l ciauri svapura
'nciamma e cunfunnì tutti li sapura
e svampa tutta 'a to' ularia.

Usati stu puema pì' cunzari
'l gnocculu sculati a puntu esattu
sdivacatili araciu nton gran piattu
pinsannu chi v'aviti a ricriari.

Rattaticidi supra 'u picurinu
e sempri c'a buccetta arriminati
e quannu sunnu beddhri ammanticati
priparativi vucca e ......cularino.

SALVATORE MAZZEO