sabato 16 gennaio 2016

OCCHI BEDDI (si sconosce l'autore di questa poesia)

OCCHI BEDDI
Occhi beddi, cchiù funni di lu mari
occhi duci, cchiù duci di lu meli
occhi mistiriusi, chini di malìa
siti accussì quannu taliati a mia.
Occhi chini d'amuri, di passioni
ca parlanu 'n silenziu senza vuci
taliannumi m'addùmanu di luci
chi trasunu 'nto cori 'n funnu, 'n funnu.
Occhi ca mi vasanu cû sguardu
m'accarizzanu macari di luntanu
mi sfioranu adaciu leggiu leggiu
occhi 'nammurati a cui nun reggiu.
Occhi ca cantati 'na canzuna
ca sapi di ciuri 'mprufumati
di frischi vuci di notti 'ncantati
sulu di li stiddi illuminati.
Mi surridìti duci appena appena
sutta un leggeru velu di tristizza
pi cupunari pocu e a malapena
chiddu ca vui sintìti d'amarizza.
Siti filici sulu pi dd'istanti
ca vui trasiti d'intra l'occhi mei
comu 'nto sognu duci e 'ncantaturi
capiti chi vvo' diri u veru amuri.
Occhi pinsusi c'annu patutu tantu
scurdannusi ca vita è vita ancora,
occhi d'unni cala di tantu in tantu
'n'amara e tristi lacrima di chiantu.
Nun 'atu statu mai accussì disiati
ucchiuzzi beddi mei, occhi 'ncantati
occhi di luci chini di puisìa,
siti accussì quannu taliati a mia.
(di Ignoto)

Nessun commento: