LU TERREMOTU DI L'UNNICI INNARU 1693
Cari litturi, sta dulenti storia
vogghiu narrarti pri cunsidirari
sti sceni ca ci fanu lacrimari
e restanu chiù vivi a la memoria.
All'unnici di innaru a vintunura
successi un terremotu autu e funnu
e pinsannuci tremu e mi cunfunnu
pri la granni e tirribili svintura.
Si vitti e nun si vitti Terranova,
Vittoria sprufunnau 'ntra la sciumara,
Commisu persi la so vita cara
e Viscari lu chiantu ci rinnova.
Tutta Scicli trimau 'ntra 'na vaddata
e Modica murìu tra li timpuna,
Tagusa prestu cascau tra li cavuna
e a Chiaramunti nun ristau casata.
Muntirrussu gridau a si ranti ranti
'ncagghiau Vizzini dintra tri muntagni
e di tanti paisi Triccastagni
cu Sciurtinu nun suffrierru scanti.
Pocu dannu patìu Canicattini,
ma Lintini chianciu li so piccati
'mmenzu l'acqua e li petri 'nsanguinati
cu so frati 'nfilici Carlintini.
Sarausa 'nghiuttìu lu sporcu mari
prichì la notti prima avìa cummisu
un sacrilegiu contra u Crucifissu
ca sfriggiatu nun si putìa taliari.
Lu Crucifissu a Sciurtinu vulau
supra l'altaru di Santa Lucia
e pui a Bedduvidiri ca splinnia
dintra 'na granni grutta si truvau.
Puzzaddu e Spaccafurnu s'incuntrarru
dintra 'nabissu e un si putìa taliari,
ma Rusulini e Notu lacrimari
si vittiru e pui dopu s'abbrazzarru.
Li genti a Giarratana e a Palazzolu
scampu truvarru fora l'abitati
Avula cu Pachinu marturiati
rimasiru 'nghiuttuti suttasuolu.
Miliddi e Francufunti traballaru
la bedda Agusta scumparìu tra l'unni
Caltagiruni ccu duluri funni
e Maccari pri miraculu ristarru.
Santamaria e Butera - spavintati -
senza casi ristarru 'ntra un mumentu
e Mazzarinu cu lu so' lamentu
l'arma straziava di l'autri citati.
Castrugiuvanni - centru di Sicilia -
vitti cadiri turri e gran palazzi,
ma iddu sulu trimau senza strapazzi
e prigannu cu gemiti si umilia.
La scossa ruvinau menza Catania,
ma Palermo e Missina - boni assai -
ristarru addura senza peni e guai
mentri ca ricitavunu a litania
Si ci cogghi la morti all'impruvvisu,
senza truvari lurda la cuscenza,
si spera ca u Signuri di climenza
ci dunarrìa lu santu paradisu!
(AUTORE IGNOTO)
Nessun commento:
Posta un commento