Passatu 'n annu, e m'hanu parsu centu
ca nun ti videvu cchiù Ortigia mia
vacanti lu me' pettu ancora sentu
pirchì lu cori lu lassai a tia.
Ora ca sugnu cca' ccu tantu amuri
mi vogghiu dedicari tuttu a tia
vogghiu passari in paci tutti l'uri
di la matina 'nzinu l'Avi Maria.
Vogghiu sustari spissu a la Marina
sintiri li canzuni di lu mari
e dill'aciduzzi musica divina.
Quannu ripartu e vaju 'a stranìa
lu cori miu ti vogghiu ridunari
pirchì ti amu Sarausa mia!
Ti amu firtili terra ginirusa
ca chianciri mi fai di nustalgìa
ti pensu sempri amata Sarausa
e soffru tantu di malincunia.
Isula ca m'ha datu li natali
m'attiri comu fussi calamita
la luntananza mi fa tantu mali
ca mi turmenta l'esistenza a vita.
Ortigia, ssì amuri e puisia
ogni criatura ti devi amari
ccu tuttu 'u cori 'nzinu a fuddìa.
Ciuri ca ssi sbucciatu 'ntà lu mari
lu focu ca mi cuva 'ntà lu pettu
è ardenti e nun si po' stutari.
Neli Seguino
Nessun commento:
Posta un commento