'A 'NFRUENZA
- E chi sacciu, cummari Pruvvidenza...!
Ju sempri dicu, 'ntra la me' 'gnuranza,
ca siddu non facemu pinitenza
muremu tutti, nobili e mastranza!...
L'èbbichi su' canciati!... La 'mprudenza
di l'omu è tali ca non c'è spiranza
di sarvarini l'arma e la cuscenza...
E paradisu nuddu, chiù nn'accanza!
A 'dd'èbbica chi c'era 'sta 'nfruenza,
e chi c'era - parrannu ccu crianza -
'stu corpu sempri sciotu, 'n pirmanenza?
Chista è manu di Diu ca non si scanza!...
E vui, bellu, parrannu 'n cunfidenza,
macari l'âti fattu, ôcche mancanza!...
Nino Martoglio
Note. - 'A nfruenza (l'influenza) - Chi sacciu (che so) - Siddu (se) - L'èbbichi (le epoche, i tempi) -
Nuddu (nessuno) - Accanza (ottenere, conseguire)
Nessun commento:
Posta un commento