LA CELESTI TRAGGERIA
Maria Teresa e Nofriu
s'avevanu a spusari,
ma un incidenti d'autu
li vosi massacrari.
Essennu puri e virgini,
fidili a lu Vancelu,
sinn'acchianaru subitu.
manu manuzza 'n celu.
E lesti s'apprisentanu
li dui 'mparadisu,
unni San Petru, affabuli,
l'accogli c'un surrisu.
Patri, dici lu giuvini,
prima ca nui trasemu,
circati prestu un parrucu,
spusari ni vulemu.
Pirchì è cosa loggica
pi viviri cuntenti
ddocu bisogna trasiri
'nsemi a li Sacramenti.
Si cummuviu l'apostulu,
e approva estasiatu,
dici: - Figghi carissimi,
è giustu su dittatu.
Unu qualunqui càpitu,
ca poi su' tuti uguali,
un cappilanu, un viscuvu,
un papa o un cardinali -.
Cummossu, cu li lacrimi
lava varba e mustazzu
poi, tra na schera d'angiuli,
parti ca pari un razzu.
E doppu un ghiornu, ecculi
all'urizzunti attornu,
San Petru 'nzemi all'Angiuli
ca sunnu di ritornu.
Li dui picciotti, alleghiri,
si vasanu amurusi,
dicennu l'unu all'autra:
- prestu saremu spusi!
E vardannu la nuvula
ca veni di luntanu,
comu Francisca e Paulu
si tenunu pi manu.
Torna lu Santu Apostulu,
cu l'ali soi calati,
e l'anciuleddi chianciunu
tutti murtificati.
Grida San Petru: - E' inutili,
varda chi porcu munnu!
ìmparadisu, criditimi,
parrini 'un ci nni sunnu!
Giuseppe Denaro
Nessun commento:
Posta un commento